ପ୍ରିଜମ୍ ନ୍ୟୁଜ ବ୍ୟୁରୋ: ଯାଆଁଳା ସନ୍ତାନଙ୍କ ଜନ୍ମ କଥା ପ୍ରାୟ ସମସ୍ତେ ଜାଣିଥିବେ ବା ଦେଖିଥିବେ। ତେବେ ଯାଆଁଳା ପିଲା କହିଲେ ୨ ବା ୩ ଟି ଶିଶୁ ଏକାସାଙ୍ଗରେ ଜନ୍ମ ହେବାକୁ ବୁଝାଏ। କିନ୍ତୁ ଏକାସାଙ୍ଗରେ ୧୦ ଟା ପିଲା ଜନ୍ମ ଦେବା ଆଚାର୍ଯ୍ୟ ଜନକ କଥା ନୁହେଁ କି? କିନ୍ତୁ ଏଭଳି ସତ ସତିକ ଘଟଣା ଦକ୍ଷିଣ ଆଫ୍ରିକାରରେ ଦେଖିବାକୁ ମିଳିଛି।ଦକ୍ଷିଣ ଆଫ୍ରିକାର ପ୍ରିଟୋରିଆର ଗୋସିୟମ୍ ଥାମାରା ସିଥୋଲ୍ ନାମକ ଜଣେ ୩୭ ବର୍ଷ ବୟସ୍କା ମହିଳା ଏକାଥରକେ ୧୦ ଟି ସନ୍ତାନ ଜନ୍ମ ଦେଇଛନ୍ତି। ବିଶ୍ବରେ ଏହି ଘଟଣା ପ୍ରଥମ ଥର ପାଇଁ ଘଟିଛି ବୋଲି କୁହାଯାଏ। ଯାଆଁଳା ସନ୍ତାନଙ୍କ ମା ’ଗୋସିଆମ୍ ଥାମାରା ସିଥୋଲ୍ ସାତ ପୁଅ ଏବଂ ତିନି ଝିଅଙ୍କୁ ଜନ୍ମ ଦେଇଛନ୍ତି। ତେବେ ଏସବୁ ଦେଖି ଥାମରା ସିଥୋଲ ନିଜେ ଆଶ୍ଚର୍ଯ୍ୟ ହୋଇଛନ୍ତି। କାରଣ ପ୍ରାରମ୍ଭିକ ଯାଞ୍ଚ ସମୟରେ ଡାକ୍ତରମାନେ ୬ ଟି ପିଲା ତାଙ୍କ ପେଟରେ ରହିଥିବାର ପ୍ରକାଶ କରିଥିଲେ। ଥାମାରା ସିଥୋଲ ଏହି ଶିଶୁମାନଙ୍କୁ ଜୁନ୍ ୭ ତାରିଖ ରେ ପ୍ରିଟୋରିଆର ଏକ ଡାକ୍ତରଖାନାରେ ଜନ୍ମ ଦେଇଛନ୍ତି।
ଗଣମାଧ୍ୟମ ରିପୋର୍ଟ ଅନୁଯାୟୀ, ଗୋସିଆମ୍ ଥାମାରା ସିଥୋଲ୍ ଦାବି କରିଛନ୍ତି ଯେ ସେ ସ୍ୱାଭାବିକ ଭାବରେ ଗର୍ଭବତୀ ହୋଇଥିଲେ, କିନ୍ତୁ ସନ୍ତାନ ପ୍ରସବ କରିବା ତାଙ୍କ ପାଇଁ ସହଜ ନଥିଲା। କାରଣ ଗର୍ଭାବସ୍ଥାରେ ତାଙ୍କ ଗୋଡରେ ବହୁତ ଯନ୍ତ୍ରଣା ଏବଂ ହୃଦଘାତ ଜନିତ ସମସ୍ୟା ଭୋଗିବାକୁ ପଡିଥିଲା।
ତେବେ ଗୋସିଆମ୍ ଥାମାରା ସାଇଥୋଲଙ୍କ ଦାବି ଏପର୍ଯ୍ୟନ୍ତ କୌଣସି ସ୍ୱାସ୍ଥ୍ୟ ବିଶେଷଜ୍ଞ କିମ୍ବା ଗିନିଜ ୱାର୍ଲ୍ଡ ରେକର୍ଡ ଦ୍ୱାରା ପ୍ରମାଣିତ ହୋଇନାହିଁ। ଯଦି ତାଙ୍କ ଦାବି ସତ ହୋଇଯାଏ, ଗୋଟିଏ ଗର୍ଭଧାରଣରେ ୧୦ ଟି ଶିଶୁ ଜନ୍ମ କରିବା ଏକ ନିଆରା ବିଶ୍ୱ ରେକର୍ଡ ସୃଷ୍ଟି କରିପାରେ। ତେବେ ଗୋଟିଏ ଗର୍ଭଧାରଣରେ ବହୁ ସଂଖ୍ୟାରେ ସନ୍ତାନ ଜନ୍ମ କରିବାର ରେକର୍ଡ ବର୍ତ୍ତମାନ ମାଲିର ମହିଳା ହଲିମା ସିସେଙ୍କ ନାମରେ ଅଛି। ହଲିମା ସିସେ ମେ ମାସରେ ମୋରୋକୋ ଡାକ୍ତରଖାନାରେ ନଅ ଶିଶୁଙ୍କୁ ଜନ୍ମ ଦେଇଥିଲେ। ଏକ ବିପଦପୂର୍ଣ୍ଣ ଗର୍ଭଧାରଣର ଆଶଙ୍କା ଦେଖି ଗୋସିଆମ୍ ଥାମାରା ସିଥୋଲ୍ ଚିନ୍ତିତ ଥିଲେ, ଏବଂ ତାଙ୍କ ମନରେ ଡର ଥିଲା ଯେ ହୁଏତ ତାଙ୍କ ସନ୍ତାନମାନେ ନବଞ୍ଚିପାରନ୍ତି। ତଥାପି, ସମସ୍ତ ୧୦ ଜଣ ଶିଶୁ ସୁସ୍ଥ ଅଛନ୍ତି ଏବଂ ଆଗାମୀ କିଛି ମାସ ପାଇଁ ସ୍ବାସ୍ଥ୍ୟ ଅବସ୍ଥାରେ ବିକାଶ ପାଇଁ ଇନକ୍ୟୁଭେଟରରେ ସେମାନଙ୍କୁ ରଖାଯିବ ବୋଲି କୁହାଯାଇଛି।
