ପୁରୁଷପଣିଆ ପ୍ରମାଣ ପାଇଁ ଜଙ୍ଗଲୀ ସିଂହ ସହ ଲଢ଼ନ୍ତି ଏହି ଦେଶର ଯୁବକ

ପ୍ରିଜମ୍ ନ୍ୟୁଜ ବ୍ୟୁରୋ: ଅନେକ ଗୁଡ଼ିଏ ଦେଶକୁ ନେଇ ବିଶ୍ଵ ଗଠିତ। ତେଣୁ ବିଭିନ୍ନ ଦେଶରେ ଭିନ୍ନ ଭିନ୍ନ ସଂସ୍କୃତି, ପରମ୍ପରା ଓ ପ୍ରଥା ଦେଖିବାକୁ ମିଳେ। ଅଞ୍ଚଳ ଭିତ୍ତିରେ ମଧ୍ୟ ପରମ୍ପରା ଭିନ୍ନ ଭିନ୍ନ ରହିଥିବାର ଦେଖିବାକୁ ମିଳେ । ତେବେ ପରମ୍ପରା ନାରେ ବେଳେବେଳେ ଏମିତି କିଛି ଘଟଣା ନଜରକୁ ଆସେ ଯାହାକି ଆମ ଆଖି କାନ ବିଶ୍ବାସ କରିବା କଷ୍ଟକର ହୋଇଯାଏ। ଆଫ୍ରିକାର ମାସାଇ ଜନଜାତିରେ ସେମିତି ଏକ ଅଜବ ପରମ୍ପରା ଦେଖିବାକୁ ମିଳେ। ଏହି ଜନଜାତିର ନୂଆ ନୂଆ ଯୌବନ ପାଇଥିବା ପୁଅମାନଙ୍କୁ ସେମାନଙ୍କ ପୁରୁଷତ୍ୱ ପ୍ରମାଣ କରିବାକୁ ପଡ଼ିଥାଏ। ତେବେ ଏହି ପୁରୁଷତ୍ୱ ପ୍ରମାଣ ନା କୌଣସି ବ୍ୟକ୍ତି ସହ ନା ଯନ୍ତ୍ର ଦ୍ଵାରା ହୁଏ ବରଂ ସିଧା ଜଙ୍ଗଲର ରାଜା ସିଂହ ସହ ହୋଇଥାଏ। ଏହା ସତ୍ୟ ଯେ ଜୀବନକୁ ପାଣି ଛଡେଇ ମାସାଇ ଜନଜାତିର ଯୁବକମାନଙ୍କୁ ସେମାନଙ୍କର ପୁରୁଷତ୍ୱ ପ୍ରମାଣ କରିବା ପାଇଁ ସିଂହ ସହିତ ଲଢ଼ିବାକୁ ପଡିଥାଏ। କେବଳ ସେତିକି ନୁହେଁ, ସିଂହକୁ ଜୀବନ୍ତ କିମ୍ବା ମୃତ ଆଣିବା ପରେ ନିଷ୍ପତ୍ତି ହୋଇଥାଏ ଯେ ବାଳକ କେତେ ସାହସୀ। ଏଭଳି କରି ଦେଖାଉଥିବା ଯୁବକଙ୍କୁ ଏହି ଜନଜାତିରେ ବହୁତ ସମ୍ମାନର ସହିତ ଦେଖାଯାଏ। ଏହି ପରମ୍ପରା ମାସାଇ ମାରନ ଜନଜାତି ଲୋକଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା, କାରଣ ସେମାନେ ଯୁଦ୍ଧ କଳାରେ ପାରଦର୍ଶୀ ଲାଭ କରିଥିଲେ ଏବଂ ସେମାନଙ୍କୁ ପରାସ୍ତ କରିବା ସାଧାରଣ ଲୋକଙ୍କ ପକ୍ଷେ ସମ୍ଭବ ନଥିଲା।
ଏହି ଅନନ୍ୟ ପରମ୍ପରା ଅନୁଯାୟୀ ଯବାନ ହୋଇଥିବା ପୁଅମାନଙ୍କୁ ସମଗ୍ର ସମ୍ପ୍ରଦାୟ ସାମ୍ନାରେ ନିଜର ପୁରୁଷତ୍ୱ ପ୍ରମାଣ କରିବାକୁ ପଡୁଥିଲା। ଏଥିପାଇଁ ତାଙ୍କୁ ଜଙ୍ଗଲରେ ଏକାକୀ ରାତି କଟାଇବାକୁ ପଡ଼େ ଏବଂ ସିଂହ ମୁହଁରୁ ତାର ଖାଦ୍ୟ ଛଡ଼ାଇ ନିଜର ଯୁଦ୍ଧ ଦକ୍ଷତା ଦେଖାଇବାକୁ ପଡିଥାଏ। କେନିଆରେ ରହୁଥିବା ମାସାଇ ମାରନ ଜନଜାତିର ପୁରୁଷମାନଙ୍କୁ ଏହି ସବୁ କରିବାକୁ ପଡ଼ିଥାଏ, ନଚେତ୍ ସେମାନେ ନିଜ ସମ୍ପ୍ରଦାୟରେ ଅପମାନିତ ହୋଇଥାନ୍ତି। ରୀତିନୀତି ଅନୁଯାୟୀ, ସିଂହ ସହିତ ଯୁଦ୍ଧ କରି ତାକୁ ମାରି ମୃତ ଭାବେ ଆଣିବାକୁ ହୁଏ କିମ୍ବା ଆହତ କରି ଜୀବନ୍ତ ଆଣିବାକୁ ପଡ଼େ। ଯିଏ ଏପରି କରିବାକୁ ସକ୍ଷମ ହୋଇଥାଏ ସେ ଜଣେ ପୁରୁଷ ଭାବରେ ପରିଗଣିତ ହେବାସହ ସହ ବିବାହ ପାଇଁ ଯୋଗ୍ୟ ବୋଲି ନିଶ୍ଚିତ ହେଉଥିଲା। ଏହିପରି ପୁରୁଷମାନେ ସମାଜରେ ସମ୍ମାନିତ ହୋଇଥିଲେ ଏବଂ ସେମାନଙ୍କୁ କିଛି ଭିନ୍ନ ସୁବିଧା ମଧ୍ୟ ଦିଆଯାଉଥିଲା।
କିନ୍ତୁ ଏବେ ଦୁନିଆରେ ସିଂହ ଜନସଂଖ୍ୟା ହ୍ରାସ ହେବା ପରେ ସେମାନଙ୍କ ରୀତିନୀତିରେ ପରିବର୍ତ୍ତନ ଆସିଛି। ଏବେବି ମାସାଇ ମାରନ ଜନଜାତିର ଯୁବକମାନଙ୍କୁ ପୁରୁଷତ୍ୱକୁ ପ୍ରମାଣ କରିବାକୁ ପଡିଥାଏ। କିନ୍ତୁ ଏବେ ସେମାନେ ସିଂହ ଦ୍ଵାରା ନୁହେଁ ବରଂ ମାସାଇ ଅଲିମ୍ପିକ୍ସ ପରି ପ୍ରତିଯୋଗିତାରେ ଭାଗ ନେଇ ନିଜ ଶକ୍ତିର ପ୍ରଦର୍ଶନ କରିଥାନ୍ତି। ବର୍ତ୍ତମାନ ଦୌଡ଼, ଜାଭେଲିନ୍ ଥ୍ରୋ ଏବଂ ହାଇ ଜମ୍ପ ଭଳି ପ୍ରତିଯୋଗିତାରେ ଭାଗ ନେଇ ବଳ ପ୍ରଦର୍ଶନ କରିଥାନ୍ତି ସେମାନେ। ମାସାଇ ଯୁବକମାନେ ଅଲିମ୍ପିକ୍ସରେ ପାଇଥିବା ପୁରସ୍କାର ସହିତ ସେମାନଙ୍କର ଅଧ୍ୟୟନ ଏବଂ ସ୍ୱପ୍ନ ପୂରଣ କରନ୍ତି | ବର୍ତ୍ତମାନ ସେ ଏହି ପ୍ରତିଯୋଗିତାରେ ନିଜ ନାମକୁ ଦୁନିଆର ଶୀର୍ଷରେ ରଖିବାକୁ ଚାହୁଁଛନ୍ତି।