ପ୍ରିଜମ ନ୍ୟୁଜ ବ୍ୟୁରୋ: ୟୁନିସେଫ୍, ରାଜ୍ୟ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ନିର୍ଦ୍ଦେଶାଳୟ (SIH & FW) ଏବଂ ଅଲ୍ ଇଣ୍ଡିଆ ରେଡିଓର ମିଳିତ ସହଯୋଗରେ ଶନିବାର ଭୁବନେଶ୍ୱର ଠାରେ “ଜୀବନ ସଂଗୀତ “ରେଡିଓ ଡକ୍ୟୁ-ଡ୍ରାମା କାର୍ଯ୍ୟକ୍ରମ ଅଧୀନରେ ଚାଲିଥିବା କୁଇଜ୍ ପ୍ରତିଯୋଗିତାର ଓଡିଶାର ଚବିଶ ଜଣ ବିଜେତାଙ୍କୁ ସମ୍ମାନିତ କରାଯାଇଛି ।
ଜୀବନ ସଂଗୀତ ନାମିତ ଏଇ ଡକୁଡ୍ରାମା କାର୍ଯ୍ୟକ୍ରମ ସାମୁହିକ ଟୀକାକରଣ, ଯକ୍ଷ୍ମା ପିଲାଙ୍କ ଠାରେ ଦେଖା ଦେଉଥିବା ରକ୍ତହୀନତା,ହଇଜା ଭଳି ରୋଗ ବିଷୟରେ ସଚେତନତା ସୃଷ୍ଟି କରିବା ଉଦ୍ଧେଶ୍ୟରେ ୨୦୨୨ ମସିହାରେ ଆରମ୍ଭ ହୋଇଥିଲା । ବିଭିନ୍ନ ସ୍ୱାସ୍ଥ୍ୟ ପ୍ରସଙ୍ଗରେ ୧୦ଟି ଡକୁ ଡ୍ରାମାର ଏକ ସିରିଜ୍ ସପ୍ତାହରେ ତିନିଥର ପ୍ରସାରିତ ହେଉଥିଲା ।
ଶ୍ରୋତାମାନଙ୍କ ପାଇଁ ପ୍ରତ୍ୟେକ ବିଷୟ ଉପରେ ଏକ କୁଇଜ୍ ପ୍ରତିଯୋଗିତା ହୋଇଥିଲା | ଏହି କାର୍ଯ୍ୟକ୍ରମ ଓଡିଶାର ଏକ ମିଲିୟନରୁ ଅଧିକ ରେଡିଓ ଶ୍ରୋତାଙ୍କ ନିକଟରେ ପହଞ୍ଚିଛି। ପ୍ରାପ୍ତ ୨୦, ୦୦୦ କୁଇଜ୍ ଏଣ୍ଟ୍ରି ମଧ୍ୟରୁ 24ଜଣ ଶ୍ରୋତାଙ୍କୁ ଭାଗ୍ୟଶାଳୀ ଡ୍ର ସିଷ୍ଟମରେ ସମ୍ମାନିତ କରାଯାଇଥିଲା |
ୟୁନିସେଫର ଏହି ଉଦ୍ୟମକୁ ଅଭିନନ୍ଦନ ଜଣାଇ ଡକ୍ଟର ଅମରେନ୍ଦ୍ରନାଥ ମହାନ୍ତି, ନିର୍ଦ୍ଦେଶକ, SIH & FW, ଓଡ଼ିଶା କହିଛନ୍ତି, “ଲୋକଙ୍କ ପାଖକୁ ସୂଚନା ପହଞ୍ଚାଇବା ଓ ଯୋଗାଯୋଗରେ ରେଡିଓ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ସ୍ୱାସ୍ଥ୍ୟ ସମସ୍ୟା ଉପରେ ଆମେ ଏହିପରି ଅଧିକ କାର୍ଯ୍ୟକ୍ରମ ଡିଜାଇନ୍ କରିବୁ ଯାହା ଲୋକଙ୍କୁ ସୂଚନା, ଶିକ୍ଷା ଦେବା ସହ ମନୋରଞ୍ଜନଧର୍ମୀ ମଧ୍ୟ ହେବ ”।
ପ୍ରଥମ ସଂସ୍କରଣର ସଫଳତା ପାଇଁ ୟୁନିସେଫ୍ ଭୁବନେଶ୍ୱର ଫିଲ୍ଡ ଅଫିସ୍ ମୁଖ୍ୟ ଡ଼ ସୁଗାତ ରୟ ଚଳିତ ବର୍ଷ ଜୀବନ ସଂଗୀତ 2.0 ଲଞ୍ଚ କରିବାକୁ ଘୋଷଣା କରିଛନ୍ତି । “ରେଡିଓ ଏକ ଶକ୍ତିଶାଳୀ ମାଧ୍ୟମ ଏବଂ ଏହା ଆଚରଣଗତ ପରିବର୍ତ୍ତନରେ ଏକ ପ୍ରମୁଖ ଭୂମିକା ଗ୍ରହଣ କରିପାରିବ | ଆମେ ଘୋଷଣା କରି ଆନନ୍ଦିତ ଯେ ଖୁବ ଶୀଘ୍ର ଆମେ ଆମର ଶ୍ରୋତାମାନଙ୍କ ପାଇଁ ଅଧିକ ବିଷୟବସ୍ତୁ ସହିତ ଜୁନ୍ କିମ୍ବା ଜୁଲାଇ ସୁଦ୍ଧା “ଜୀବନ ସଂଗୀତ” 2.0 ରୁ ଆରମ୍ଭ କରିବୁ। ”
ୟୁନିସେଫ୍, ଏ ଆଇ ଆର (A I R ) ଏବଂ ଶ୍ରୋତାମାନଙ୍କ ସକ୍ରିୟ ଅଂଶଗ୍ରହଣ ପାଇଁ ଓଡିଶା ପରିବାର କଲ୍ୟାଣ ବିଭାଗ ନିର୍ଦ୍ଦେଶକ ଡକ୍ଟର ବିଜୟ କୁମାର ପାଣିଗ୍ରାହି ମଧ୍ୟ ପ୍ରଶଂସା କରିଛନ୍ତି।
ଅନ୍ୟ ମାନଙ୍କ ମଧ୍ୟରେ ଡକ୍ଟର ତାପସ କୁମାର ପାତ୍ର , SEPIO, ଓଡିଶା; ଶ୍ରୀ ଚିରଞ୍ଜୀବୀ ରାଉତରାୟ,ଷ୍ଟେସନ ହେଡ୍, ବାଣିଜ୍ୟିକ ପ୍ରସାରଣ ସେବା, AIR, କଟକ; ପୁଷ୍ପାଞ୍ଜଳି ମିଶ୍ର ,ଯୁଗ୍ମ ନିର୍ଦ୍ଦେଶକ, SIH & FW ଏବଂ ଡକ୍ଟର ସ୍ମୃତିଜିତ ପଟ୍ଟନାୟକ ଯୁଗ୍ମ ନିର୍ଦ୍ଦେଶକ (ନ୍ୟୁଟ୍ରିସନ), DFW,ଉପସ୍ଥିତ ଥିଲେ ।
