ସିଦ୍ଧାର୍ଥ- ଶାହନାଜଙ୍କ ଭିତରେ କ’ଣ ଘଟିଥିଲା ସେଦିନ ରାତିରେ

ପ୍ରିଜମ୍ ନ୍ୟୁଜ ବ୍ୟୁରୋ: ଟିଭି ଏବଂ ଚଳଚ୍ଚିତ୍ର ଇଣ୍ଡଷ୍ଟ୍ରିର ଜଣାଶୁଣା ଅଭିନେତା ସିଦ୍ଧାର୍ଥ ଶୁକ୍ଲା ଅସମୟରେ ସମସ୍ତଙ୍କୁ ଦୁଃଖ ସାଗରରେ ଭସେଇ ଆରପାରିକୁ ଚାଲି ଯାଇଛନ୍ତି। ସିଦ୍ଧାର୍ଥ ଶୁକ୍ଲାଙ୍କର ୪୦ ବର୍ଷ ବୟସରେ ହଠାତ୍ ହୃଦଘାତରେ ମୃତ୍ୟୁ ହୋଇଛି। ଅଭିନେତାଙ୍କ ମୃତ୍ୟୁପରେ ପରିବାର, ବନ୍ଧୁବାନ୍ଧବ ଏବଂ ପ୍ରଶଂସକମାନେ ଚକିତ ହୋଇଯାଇଥିଲେ। ସମସ୍ତେ ଜାଣିବାକୁ ଚାହାଁନ୍ତି ସେହି କାଳ ରାତିରେ ହଠାତ୍ କ’ଣ ହୋଇଥିଲା? ସେଦିନ ବିଳମ୍ବିତ ରାତିରେ କଣ ହୋଇଥିଲା ଜାଣନ୍ତୁ। ରାତି ପ୍ରାୟ ୩ ରୁ ୩.୩୦ ମଧ୍ୟରେ ସିଦ୍ଧାର୍ଥ ଶୁକ୍ଲା ତାଙ୍କ ପାଖେ ଥିବା ଶାହନାଜ ଗିଲଙ୍କୁ କହିଥିଲେ ଯେ ସେ ବ୍ୟସ୍ତ ଅନୁଭବ କରୁଛନ୍ତି, ଛାତିରେ ଯନ୍ତ୍ରଣା ହେଉଛି ଏବଂ ଅସୁବିଧା ଲାଗୁଛି।
ଏହା ପରେ ଶାହନାଜ ଗିଲ ସିଦ୍ଧାର୍ଥଙ୍କ ମା’ଙ୍କୁ ଡାକିଥିଲେ। ସିଦ୍ଧାର୍ଥଙ୍କ ମା’ ମଧ୍ୟ ସେହି ଆପାର୍ଟମେଣ୍ଟର ପଞ୍ଚମ ମହଲାରେ ରୁହନ୍ତି। ସିଦ୍ଧାର୍ଥଙ୍କ ମା’ ଶାହନାଜ ଗିଲଙ୍କ କଲ ପରେ ୧୨୦୪ ନମ୍ବର ଫ୍ଲାଟକୁ ଆସିଥିଲେ। ମା’ ସିଦ୍ଧାର୍ଥଙ୍କ ସହ କଥା ହୋଇଥିଲେ ଏବଂ ଅଭିନେତାଙ୍କୁ ପାଣି ଦେବା ପରେ ଅଭିନେତାଙ୍କୁ ଶୋଇବାକୁ କହିଥିଲେ। ଆଖିବନ୍ଦ କରି ଶୋଇବାକୁ ଚେଷ୍ଟା କରିବା ଉଚିତ୍ ବୋଲି ମା’ କହିଥିଲେ।
ଏହା ପରେ ସିଦ୍ଧାର୍ଥ ଶୁକ୍ଲା ଶାହନାଜ ଗିଲଙ୍କ ପାପୁଲିରେ ମୁଣ୍ଡ ରଖି ଶୋଇପଡିଥିଲେ, ତାପରେ ଆଉ ସେ ଉଠିନଥିଲେ। ପୋଲିସକୁ ଦିଆଯାଇଥିବା ବିବୃତ୍ତିରେ ଶାହନାଜ ଗିଲ କହିଛନ୍ତି ଯେ ତାଙ୍କୁ ୱାଶରୁମ ଯିବାକୁ ପଡୁଥିଲା, କିନ୍ତୁ ସିଦ୍ଧାର୍ଥଙ୍କ ଅସୁବିଧା ଦେଖି ସେ ଖଟରୁ ବାହାରକୁ ଯାଇ ନଥିଲେ। ସେ କହିଛନ୍ତି ଯେ ମୁଁ ଭୟ କଲି ଯେ କାଳେ ସିଦ୍ଧାର୍ଥ ଉଠିପଡ଼ି ଅଶାନ୍ତ ହୋଇପାରନ୍ତି। ସକାଳ ପ୍ରାୟ ସାଢେ଼ ୫ଟା ବେଳେ ଶାହନାଜ ସିଦ୍ଧାର୍ଥଙ୍କ ଶରୀର ଥଣ୍ଡା ହୋଇଯାଇଥିବାର ଅନୁଭବ କରିଥିଲେ। ଶେହନାଜ ଏହାପରେ ତୁରନ୍ତ ସିଦ୍ଧାର୍ଥଙ୍କ ମା’ଙ୍କୁ ଡାକି କହିଥିଲେ ଯେ ସିଦ୍ଧାର୍ଥଙ୍କ ଶରୀର ଥଣ୍ଡା ହୋଇଯାଇଛି।
ସିଦ୍ଧାର୍ଥଙ୍କ ବଡ ଭଉଣୀ ପ୍ରୀତି ମଧ୍ୟ ସେହି ଆପାର୍ଟମେଣ୍ଟରେ ରୁହନ୍ତି। ସିଦ୍ଧାର୍ଥଙ୍କ ମା’ ଏ ବିଷୟରେ ପ୍ରୀତିଙ୍କୁ ସୂଚନା ଦେଇଥିଲେ। ଏହା ପରେ ସମଗ୍ର ପରିବାର ଫ୍ଲାଟ ନମ୍ବର ୧୨୦୪ ରେ ପହଞ୍ଚିଥିଲେ, ସିଦ୍ଧାର୍ଥଙ୍କ ଶରୀର ଥଣ୍ଡା ହୋଇଗଲା। ପରିବାର ସିଦ୍ଧାର୍ଥଙ୍କୁ ଖଟରୁ ତଳକୁ ଓହ୍ଲାଇ ତାଙ୍କ ଶ୍ୱାସକ୍ରିୟା ଯାଞ୍ଚ କରିଥିଲେ, ନାଡିର ଯାଞ୍ଚ କରି ପରିବାର ଲୋକେ ଡାକ୍ତରଙ୍କୁ ଡାକିଥିଲେ। ସିଦ୍ଧାର୍ଥଙ୍କ ଭିଣୋଇ, ଭଉଣୀ ଏବଂ ଘନିଷ୍ଠ ବ୍ୟକ୍ତି କପୁର୍ ହସ୍ପିଟାଲରେ ପହଞ୍ଚିବା ପରେ କପୁର୍ ହସ୍ପିଟାଲର ଡାକ୍ତର ସିଦ୍ଧାର୍ଥଙ୍କୁ ପରୀକ୍ଷା କରିବା ପରେ ତାଙ୍କୁ ଏଠାରୁ ଆଣିବା ପୂର୍ବରୁ ମୃତ୍ୟୁ ହୋଇଥିଲା ବୋଲି କହିଥିଲେ।