ବିହାରରେ ଉପରକୁ ଉଠୁଛି କଂଗ୍ରେସ, ଏଥର ଏକାକୀ ଲଢ଼ିବ ?

ପ୍ରିଜମ୍‌ ନ୍ୟୁଜ ବ୍ୟୁରୋ: ବିହାର ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ନିଜର ସମୀକରଣକୁ ମଜଭୁତ କରିବାରେ ଲାଗିଛି । କାରଣ, ଗ୍ରାଣ୍ଡ ଓଲ୍‌ଡ ପାର୍ଟିର ମହାମେଣ୍ଟ ଉପରୁ ମୋହଭଙ୍ଗ ହୋଇସାରିଛି । କହ୍ନୈୟା କୁମାର ରାଜନୈତିକ ପିଚ୍‌କୁ ଓହ୍ଲାଇବା ପରେ କଂଗ୍ରେସ ପିସିସି ସଭାପତି ପରିବର୍ତ୍ତନ କରିଛି । ଏହା ପୂର୍ବରୁ ବିହାରର ପ୍ରଭାରୀ ବଦଳିଥିଲେ । ଆଉ କଂଗ୍ରେସ କୃଷ୍ଣା ଅଲ୍ଲାବୁରୁଙ୍କୁ ଆଣିଛି । ଲାଲୁଙ୍କ ଘନିଷ୍ଠ ଅଖିଲେଶ ପ୍ରସାଦ ସିଂହଙ୍କୁ ପ୍ରଦେଶ କଂଗ୍ରେସ ସଭାପତି ପଦରୁ ହଟାଇ ଦିଆଗଲା । ତାଙ୍କ ବଦଳରେ ଦଳିତ ବିଧାୟକ ରାଜେଶ କୁମାରଙ୍କୁ ବିହାର କଂଗ୍ରେସର କମାଣ ସମ୍ଭାଳିବାକୁ କୁହାଯାଇଛି । ଏଭଳି ସ୍ଥିତିରେ ପ୍ରଶ୍ନ ଉଠୁଛି ଯେ, ବିହାରରେ କଂଗ୍ରେସ କ’ଣ ଲାଲୁ ଯାଦବଙ୍କ ଛତ୍ରଛାୟା ତଳୁ ବାହାରି ଏକ୍‌ଲା ଚଲୋ ନ୍ୟାୟରେ ଆରମ୍ଭ କରିଛି ନିର୍ବାଚନ ପ୍ରସ୍ତୁତି ?
ଦୀର୍ଘ ବର୍ଷ ଧରି କଂଗ୍ରେସ ବିହାରରେ କ୍ଷମତା ବାହାରେ ଅଛି । ଫଳରେ ତୃଣମୂଳସ୍ତରରେ ଲୋକଙ୍କଠାରୁ ଢେର୍‌ ଦୂରକୁ ପଳାଇ ଯାଇଛି କଂଗ୍ରେସ । ତୃଣମୂଳସ୍ତରର ଅନେକ ନେତା ଦଳ ଛାଡ଼ିଛନ୍ତି । ଫଳରେ ଲାଲୁ ଯାଦବଙ୍କ ସହାନୁଭୂତି ଏବଂ ଛତ୍ରଛାୟା ତଳେ ରହି କଂଗ୍ରେସ ବିହାରରେ ରାଜନୀତି କରୁଛି । ଦିଲ୍ଲୀ ନିର୍ବାଚନ ପରେ ଏବେ କଂଗ୍ରେସର ରାଜନୀତି ବଦଳି ଯାଇଛି । ଏବେ ଗ୍ରାଣ୍ଡ ଓଲ୍‌ଡ ପାର୍ଟି ନିଜ ଦମ୍‌ରେ ନିର୍ବାଚନ ଲଢ଼ିବାକୁ ଅଣ୍ଟା ଭିଡ଼ିଛି ।
ଯୁବନେତାଙ୍କ ଉପରେ କଂଗ୍ରେସର ଫୋକସ୍‌
ବିହାରରେ ରାଜନୈତିକ ଉଷ୍ମତା ଦେଖାଦେବା ପରେ କଂଗ୍ରେସ ମୋହନ ପ୍ରକାଶଙ୍କୁ ହଟାଇ ଯୁବନେତା କୃଷ୍ଣା ଅଲ୍ଲାବୁରୁଙ୍କୁ ନିଯୁକ୍ତ କରିଛି । ଏହାପୂର୍ବରୁ ସହ ପ୍ରଭାରୀ ଭାବେ ଶାହନବାଜ ଆଲମ୍‌ ଓ ସୁନୀଲ ପାସୀଙ୍କୁ ନିଯୁକ୍ତି ଦିଆଯାଇଥିଲା । ଏହି ତିନି ଜଣଯାକ ହେଉଛନ୍ତି ଯୁବ ଚେହେରା ଏବଂ ରାହୁଲ ଗାନ୍ଧିଙ୍କ ଘନିଷ୍ଠ । କୃଷ୍ଣା ଅଲ୍ଲାବୁରୁଙ୍କ ପୂର୍ବରୁ ବିହାର କଂଗ୍ରେସରେ ଏକ ପରମ୍ପରା ଥିଲା ଯେ, ଯିଏ ବି ପ୍ରଦେଶ ଅଧ୍ୟକ୍ଷ କିମ୍ବା ବିହାର ପ୍ରଭାରୀ ହେଉଥିଲେ, ସେ ଲାଲୁଙ୍କ ଶରଣ ନିଶ୍ଚୟ ପଶୁଥିଲେ । କିନ୍ତୁ ଏବେ ସମୟ ବଦଳିଛି । କୃଷ୍ଣା ଅଲ୍ଲାବୁରୁ ବିହାର ଗସ୍ତରେ ଯିବା ପରେ ନା ସେ ଲାଲୁଙ୍କୁ ଭେଟିଥିଲେ ନା ତେଜସ୍ବୀଙ୍କୁ ସାକ୍ଷାତ କରିଥିଲେ । ଏହାପରେ ସେ କଂଗ୍ରେସ ଆରଜେଡିର ବି-ଟିମ୍‌ ନୁହେଁ ବୋଲି ମଧ୍ୟ କହିଥିଲେ । ଏହାସହ କୃଷ୍ଣା ଅଲ୍ଲାବୁରୁ ସଂକେତ ଦେଇଥିଲେ ଯେ, ବିହାରରେ ଏଥର କଂଗ୍ରେସ କାହା ଛାୟା ତଳେ ରହିବ ନାହିଁ । ତେବେ କୃଷ୍ଣା ଅଲ୍ଲାବୁରୁଙ୍କ ନିଯୁକ୍ତି ପରେ ଯାହା ଚର୍ଚ୍ଚା ହେଉଥିଲା, ତାହା ହିଁ ହେଲା । କଂଗ୍ରେସର ରଣନୀତିକୁ ମଜଭୁତ କରିବା ପାଇଁ ଝାଳ ବୁହାଉଥିବା କୃଷ୍ଣା ଏକ ମାସ ଭିତରେ ପ୍ରଥମ ୱିକେଟ୍‌ ଭାବେ ଅଖିଲେଶ ପ୍ରସାଦ ସିଂହଙ୍କୁ ଆଉଟ୍‌ କଲେ । ଆରଜେଡିରୁ ହିଁ ଆସିଥିଲେ ଅଖିଲେଶ । ତାଙ୍କୁ ରାଜ୍ୟସଭା ପଠାଇବାରେ ଲାଲୁ ଯାଦବଙ୍କ ଭୂମିକା ଥିଲା । କଂଗ୍ରେସ ଦଳ ଭିତରେ ଏମିତି ଏକ ଗୋଷ୍ଠୀ ଅଛନ୍ତି, ଯେଉଁମାନେ ଲାଲୁଙ୍କ ଛାୟା ତଳେ ରହି ପାର୍ଟିକୁ ଆଗକୁ ନେବାର ପ୍ରୟାସ କରିଥା’ନ୍ତି । ଏଭଳି ସ୍ଥିତିରେ ଲାଲୁଙ୍କ ଘନିଷ୍ଠ ଅଖିଲେଶ ସିଂହଙ୍କୁ ପଦଚ୍ୟୁତ କରି କଂଗ୍ରେସ ଆରଜେଡି ସହ ନିର୍ବାଚନ ନ ଲଢ଼ିବାର ଏକ ସଂକେତ ଦେଇଛି ।

ଅନ୍ଯପଟେ ବିହାରରେ ଫାୟାରବ୍ରାଣ୍ଡ ଓ ଯୁବନେତା କହ୍ନୈୟା କୁମାର ବିହାରରେ ଏଣ୍ଟ୍ରି ମାରିଛନ୍ତି । ମାର୍ଚ୍ଚ ୧୬ରୁ ସେ ବିହାରରେ ଯୁବ କଂଗ୍ରେସର ବ୍ୟାନର ତଳେ ‘ପଳାୟନ ବନ୍ଦ କର, ନିଯୁକ୍ତି ଦିଅ’ ଯାତ୍ରା ଆରମ୍ଭ କରିଛନ୍ତି। କହ୍ନୈୟା ହେଉଛନ୍ତି ଭୂମିହାର ଜାତିର । ତାଙ୍କୁ ପଦଯାତ୍ରାର କମାଣ ଦେଇ ବିହାର କଂଗ୍ରେସ ଏକ ବଡ଼ କାର୍ଡ ଖେଳିଛି । ଅନ୍ୟପଟେ କହ୍ନୈୟା କୁମାରଙ୍କ ପଦଯାତ୍ରାକୁ କୌଣସି ମେଣ୍ଟ ନେତାଙ୍କୁ ଆମନ୍ତ୍ରଣ କରା ନଯିବା, କଂଗ୍ରେସର ଏକାକୀ ନିର୍ବାଚନ ଲଢ଼ିବା ଚର୍ଚ୍ଚାକୁ ଅଧିକ ବଳ ଯୋଗାଉଛି ।

କଂଗ୍ରେସର ଦଳିତ କାର୍ଡ
କଂଗ୍ରେସ ରାଜେଶ କୁମାରଙ୍କୁ ବିହାର କଂଗ୍ରେସ ଅଧ୍ୟକ୍ଷ କରି ଦଳିତ କାର୍ଡ ଖେଳିଛି । ସେ ବିହାରର କୁଟୁମ୍ବା ବିଧାୟକ ଅଛନ୍ତି । ୨୦୨୦ରେ ସେ ବିପୁଳ ବିଜୟ ହାସଲ କରିଥିଲେ । ଦଳ ତାଙ୍କୁ ପ୍ରଦେଶ ସଭାପତି କରି ୨୦୨୫ ନିର୍ବାଚନ ତାଙ୍କ ନେତୃତ୍ବରେ ଲଢ଼ିବା ପାଇଁ ସ୍ପଷ୍ଟ କରିଛି । ଦଳିତ ସମାଜରେ ରାଜେଶ କୁମାରଙ୍କ ଭଲ ଦବ୍‌ଦବା ରହିଛି। ଚର୍ଚ୍ଚା ହେଉଛି ଯେ, ଏଥର ବିହାରରେ କଂଗ୍ରେସ ନିର୍ବାଚନ ବୈତରଣୀ ପାର୍‌ କରିବାକୁ ନୂଆ ସୋସିଆଲ ଇଞ୍ଜିନିୟରିଂ ଆରମ୍ଭ କରିଛି । ଏକଦା କଂଗ୍ରେସ ହାତରେ ଦଳିତ, ସବର୍ଣ୍ଣ ଓ ମୁସଲିମ ଭୋଟ୍‌ ବ୍ୟାଙ୍କ୍‌ ଥିଲା । ପୁଣି ଥରେ ସେହି ବର୍ଗର ଭୋଟ୍‌ ହାତେଇବା ପାଇଁ ରଣନୀତି ପ୍ରସ୍ତୁତ କରିଛି କଂଗ୍ରେସ । ରାହୁଲ ଗାନ୍ଧି ସାମାଜିକ ନ୍ୟାୟ ବାହାନାରେ ଦଳିତ ସମାଜର ଆସ୍ଥାଭାଜନ କରିବାର ପ୍ରୟାସ କରୁଛନ୍ତି । ସେଥିପାଇଁ ଲୋକସଭା ନିର୍ବାଚନ ପରେ ରାହୁଲ ଗାନ୍ଧି ୨ ଥର ବିହାର ଗସ୍ତ କରିଛନ୍ତି । ଉଭୟ ଥର ଦଳିତ ଭୋଟ୍‌ ବ୍ୟାଙ୍କ୍‌ ହାତେଇବାର ଚେଷ୍ଟା କରିଛନ୍ତି ସେ । ୨୦୨୪ ଲୋକସଭା ନିର୍ବାଚନରେ ଦଳିତ ବର୍ଗ କଂଗ୍ରେସ ସମର୍ଥନରେ ଥିଲେ, ଏଥିରୁ କଂଗ୍ରେସର ସହଯୋଗୀ ଦଳଗୁଡ଼ିକ ସତର୍କ ହୋଇଯିବା ଜରୁରୀ ।
କାରଣ, କଂଗ୍ରେସ ପୁଣି ଥରେ ସେହି ଦଳିତ କାର୍ଡ ବିହାରରେ ଖେଳିବାକୁ ଯାଉଛି, ଉତ୍ତର ପ୍ରଦେଶ ଓ ବିହାରରେ କଂଗ୍ରେସର ପତନ ପରେ ଦଳିତ ଭୋଟ୍‌, ବିଏସ୍‌ପି, ଏସ୍‌ପି, ଆରଜେଡି ଓ ଜେଡିୟୁ ହାତକୁ ପଳାଇଥିଲା, କିନ୍ତୁ ଏବେ ରାହୁଲ ଯେଉଁଭଳି ପ୍ରତିଟି ମଞ୍ଚରେ ଦଳିତ ଓ ଓବିସିଙ୍କ କଥା କହୁଛନ୍ତି, ସେଥିରୁ ଲାଗୁଛି ଯେ, ପୁଣି ଥରେ ଏହି ବର୍ଗର ଭୋଟ୍‌ କଂଗ୍ରେସ ପାଖକୁ ଫେରିବାର ସମ୍ଭାବନା ରହିଛି ।