ପ୍ରିଜମ୍ ନ୍ୟୁଜ ବ୍ୟୁରୋ: ବିଜେପି ସରକାର ଆସିବା ପରଠାରୁ ବିଧାନସଭାର ସଂଜ୍ଞା ବଦଳିଛି। ବିରୋଧ କଲେ ବିରୋଧୀଙ୍କୁ କରାଯାଉଛି ନିଲମ୍ବନ। ବିଧାନସଭା ବଜେଟ୍ ଅଧିବେଶନ ଚାଲିଥିବାବେଳେ କଂଗ୍ରେସ ବିଧାୟକ ବିରୋଧ କରିଥିଲେ । ଘଣ୍ଟ ବାଡ଼େଇ, ବଇଁଶୀ ବଜାଇ ବିଧାନସଭାରେ ସେମାନେ କରିଥିଲେ ପ୍ରତିବାଦ। ଶାସକ ଦଳ କିନ୍ତୁ ଏହାକୁ ହଜମ କରି ପାରି ନଥିଲା । ସେଥିପାଇଁ କଂଗ୍ରେସର ୧୨ ଜଣ ବିଧାୟକଙ୍କୁ ବାଚସ୍ପତି ନିଲମ୍ବିତ କରି ଦେଇଛନ୍ତି। କଥା ଏତିକିରେ ସୀମିତ ରହିଲାନି। ବିଧାୟକମାନଙ୍କୁ ବାହାର କରିବା ପାଇଁ ମାର୍ଶାଲମାନଙ୍କୁ ନିର୍ଦ୍ଦେଶ ଦେଲେ ବାଚସ୍ପତି। କିନ୍ତୁ ଏହା କେତେଦୂର ଠିକ୍ ? ରାଜ୍ୟର ବିଭିନ୍ନ ପ୍ରସଙ୍ଗକୁ ନେଇ ବିଧାନସଭାରେ ଆଲୋଚନା ହୋଇଥାଏ। ବିରୋଧୀ ସରକାରଙ୍କ ଉପରେ ଚାପ ପକାନ୍ତି। ଆଉ ସରକାର ଆଲୋଚନା କରିବା ପାଇଁ ରାଜି ହୁଅନ୍ତି। କିନ୍ତୁ ଆଜିକାଲି ଆଉ ବିଧାନସଭାରେ ସେଭଳି ଘଟୁ ନାହିଁ। ସାଧାରଣତଃ ବିରୋଧୀ ହୋହଲ୍ଲା, ହଙ୍ଗାମା କଲେ ବାଚସ୍ପତି ଗୃହକୁ ମୁଲତବୀ କରି ଦେଇଥା’ନ୍ତି। ହେଲେ ବିଜେପି ସରକାରର ବାଚସ୍ପତି ପାର୍ଲାମେଣ୍ଟ ପନ୍ଥା ଆପଣାଇଛନ୍ତି।
ତିନି ଅପରାଧିକ ବିଲ୍ ପାସ୍ କରାଇବାକୁ ସଂସଦରେ ୧୪୬ରୁ ଅଧିକ ସାଂସଦଙ୍କୁ ଯେଉଁଭଳି ବାହାର କରି ଦିଆଯାଇଥିଲା, ତାହା ସମ୍ପୂର୍ଣ୍ଣ ଅଗାଣତାନ୍ତ୍ରିକ ଥିଲା। ଯେତେ ଚାପ ପଡ଼ିଲେ ବି କିଛି ଲାଭ ହୋଇ ନଥିଲା। ଏବେ ଓଡ଼ିଶା ବିଧାନସଭା ସେହି ରାସ୍ତାରେ ଯାଉଛି। ଲୋକସଭା ବାଚସ୍ପତି ଓମ୍ ବିର୍ଲା ହୁଅନ୍ତୁ ଅବା ରାଜ୍ୟସଭା ଅଧ୍ୟକ୍ଷ ତଥା ଉପରାଷ୍ଟ୍ରପତି ଜଗଦୀପ ଧନକଡ଼, ବିରୋଧୀଙ୍କୁ ଶତ୍ରୁ ଭଳି ଆଚରଣ କରୁଛନ୍ତି। ଏହା ଆମେ ନକହିଲେ ବି ଏ ଦେଶର କୋଟିକୋଟି ଜନତା ଦେଖୁଛନ୍ତି, ଶୁଣୁଛନ୍ତି ଆଉ ପଢୁଛନ୍ତି। ଏଥର ଓଡ଼ିଶା ବିଧାନସଭାରେ ସେଭଳି କିଛି ହାଇଡ୍ରାମା ଦେଖିବାକୁ ମିଳିଛି। କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତିଙ୍କ କଲର ଧରିଥିଲେ ବିଜେପି ବିଧାୟକ ଜୟନାରାୟଣ ମିଶ୍ର। କିନ୍ତୁ ଗୃହରୁ ସସ୍ପେଣ୍ଡ ହୋଇଥିଲେ ତାରା। ଏବେ କଂଗ୍ରେସର ୧୨ ଜଣ ବିଧାୟକଙ୍କୁ ୭ ଦିନ ପାଇଁ ସସ୍ପେଣ୍ଡ କରାଯାଇଛି।
0 Comments