ଅଫିସରଙ୍କ ଗାଁ! ପ୍ରତି ଘରେ ଅଛନ୍ତି IAS ଓ IPS

ପ୍ରିଜମ୍ ନ୍ୟୁଜ ବ୍ୟୁରୋ: ଉତ୍ତରପ୍ରଦେଶର ରାଜଧାନୀ ଲକ୍ଷ୍ନୌ ଠାରୁ ୨୪୦ କିଲୋମିଟର ଦୂରରେ ଥିବା ଏକ ଗାଁର ପ୍ରାୟ ପ୍ରତ୍ୟେକ ଘରେ IAS ଏବଂ IPS ଅଛନ୍ତି। କୁହାଯାଏ ଯେ ଏହି ଗାଁରେ କେବଳ ଆଇଏଏସ୍ ଏବଂ ଆଇପିଏସ୍ ଅଧିକାରୀ ଜନ୍ମଗ୍ରହଣ କରନ୍ତି। ସମଗ୍ର ଜିଲ୍ଲାରେ ଏହାକୁ ଅଫିସରଙ୍କ ଗାଁ କୁହାଯାଏ।
କୁହାଯାଏ ଯେ ଏଠାରେ ଜନ୍ମିତ ବ୍ୟକ୍ତିଙ୍କ ଭବିଷ୍ୟତ ପୂର୍ବ ନିର୍ଦ୍ଧାରିତ, ଏବଂ ସେ ବଡ ହୋଇ ଜଣେ ଅଧିକାରୀ ହୋଇଥାନ୍ତି। ଏହି ଗାଁରେ ମାତ୍ର ୭୫ ଟି ଘର ଅଛି ଏବଂ ପ୍ରତ୍ୟେକ ଘରୁ ଜଣେ ଜଣେ IAS ଅଧିକାରୀ ଅଛନ୍ତି। ଏହି ଗାଁରୁ ୪୭ ଆଇଏଏସ୍ ଅଧିକାରୀ ଏପର୍ଯ୍ୟନ୍ତ ନିଯୁକ୍ତି ହୋଇଛନ୍ତି।
ବ୍ରିଟିଶ ସମୟରୁ ପ୍ରତିଯୋଗିତାମୂଳକ ପରୀକ୍ଷାରେ ଯୋଗଦେବା ପାଇଁ ଗାଁର ଯୁବକମାନଙ୍କ ମଧ୍ୟରେ ପ୍ରତିଯୋଗିତା ଆରମ୍ଭ ହୋଇଥିଲା। ୧୯୧୪ ମସିହାରେ, ସେହି ଗ୍ରାମର ଯୁବକ ମୁସ୍ତାଫ ହୁସେନ୍ ପ୍ରଥମେ PCS ରେ ମନୋନୀତ ହୋଇଥିଲେ। ଏହା ପରେ, ଇନ୍ଦୁ ପ୍ରକାଶ ସିଂ ୧୯୫୨ ମସିହାରେ ୧୩ ତମ ସ୍ଥାନ ଅଧିକାର କରି ଆଇଏଏସ ହୋଇଥିଲେ। ଇନ୍ଦୁ ପ୍ରକାଶଙ୍କ ଚୟନ ପରେ ଗାଁର ଯୁବକମାନଙ୍କ ମଧ୍ୟରେ IAS-PCS ପାଇଁ ପ୍ରତିଯୋଗିତା ଆରମ୍ଭ ହୋଇଥିଲା। ଇନ୍ଦୁ ପ୍ରକାଶ ସିଂ ଫ୍ରାନ୍ସ ସମେତ ଅନେକ ଦେଶରେ ଭାରତର ରାଷ୍ଟ୍ରଦୂତ ରହିଛନ୍ତି।
ମହିଳାମାନେ ମଧ୍ୟ ବହୁତ ଆଗରେ ଅଛନ୍ତି: ଏହି ଗାଁର ମହିଳାମାନେ ମଧ୍ୟ କମ୍ ନୁହଁନ୍ତି। ଗାଁର ଉଷା ସିଂ ଜଣେ ଆଇଏଏସ୍ ଅଧିକାରୀ। ଏହା ବ୍ୟତୀତ ୧୯୮୩ ରେ ଚନ୍ଦ୍ରମାଲ ସିଂ ଏବଂ ତାଙ୍କ ପତ୍ନୀ ଇନ୍ଦୁ ସିଂ ଆଇପିଏସ୍ ଅଧିକାରୀ ହୋଇଥିଲେ। କେବଳ ସେତିକି ନୁହେଁ ଇସ୍ରୋରୁ ଆରମ୍ଭ କରି ଅନେକ ବଡ଼ ବଡ଼ ପଦବୀରେ ଏହି ଗାଁରୁ ପିଲାମାନେ ଅଧିକାରୀ ପଦରେ ରହି ଆସିଛନ୍ତି। ଅଧିକାରୀ ଗାଁ ଭାବରେ ଜଣାଶୁଣା ଏହି ଗାଁର ଲୋକମାନେ କେବଳ ଅଫିସର ହେବାର ସ୍ୱପ୍ନ ଦେଖନ୍ତି। ଡକ୍ଟର ସଜଲ ସିଂଙ୍କ ଅନୁଯାୟୀ, ମୁର୍ତାଜା ହୁସେନ୍‌ ବ୍ରିଟିଶ ସରକାରଙ୍କ କମିଶନର ହେବା ପରେ ଗାଁର ଲୋକମାନେ ଅନୁପ୍ରାଣିତ ହୋଇଥିଲେ। ସେ ଆହୁରି ମଧ୍ୟ କହିଛନ୍ତି ଯେ ଆମ ଗାଁରେ ଶିକ୍ଷା ହାର ବହୁତ ଅଧିକ ଏବଂ ସମସ୍ତେ ସ୍ନାତକୋତ୍ତର କରିଛନ୍ତି।