ପ୍ରିଜମ୍ ନ୍ୟୁଜ ବ୍ୟୁରୋ: ଅଲିମ୍ପିକ୍ସରେ ସ୍ୱର୍ଣ୍ଣ ପଦକ ଜିତିବା କୌଣସି ଦେଶ ଓ ଖେଳାଳିଙ୍କ ପାଇଁ ପ୍ରକୃତରେ ଗର୍ବର କଥା। କିନ୍ତୁ ଯେତେବେଳେ ଏହି ଗର୍ବ ଏକ ପାଗଳାମିରେ ପରିଣତ ହୁଏ, ନିହାତି ଅସୁନ୍ଦର କଥା ହୁଏ। ଜାପାନରେ ଏପରି କିଛି ଘଟଣା ଘଟିଥିଲା ଯେତେବେଳେ ଟୋକିଓ ଅଲିମ୍ପିକ୍ସରେ ଜିତିଥିବା ଖେଳାଳିଙ୍କ ସ୍ୱର୍ଣ୍ଣ ପଦକ ଜଣେ ମେୟର ଖାଇଯାଇଥିଲେ।
ଅଗଷ୍ଟ ୪ ରେ ଜାପାନର ନାଗୋୟା ମେୟର ଏକ ସଫ୍ଟବଲ ଖେଳାଳିଙ୍କ ଅଲିମ୍ପିକ ସ୍ୱର୍ଣ୍ଣ ପଦକ କାମୁଡି ଦେଇଥିଲେ। ବାସ୍ତବରେ, ମେୟର ଟାକାଶୀ କାୱାମୁରା ବହୁତ ଉତ୍ସାହରେ ଖେଳାଳିଙ୍କ ସହ ଫଟୋଗ୍ରାଫି କରୁଥିଲେ ଏବଂ ଏହି ସମୟରେ ସେ ପଦକଟିକୁ ଦାନ୍ତରେ କାମୁଡ଼ି ଦେଇଥିଲେ ଯାହାଦ୍ଵାରା ପଦକଟି ଭାଙ୍ଗି ଯାଇଥିଲା।
ସାଧାରଣତଃ ଫଟୋ ଉଠାଇବା ବେଳେ ପଦକ ବିଜେତାମାନେ ଏହାକୁ ପାଟିରେ ଚୁମି ପୋଜ୍ କରିବାକୁ ପସନ୍ଦ କରନ୍ତି। କିନ୍ତୁ ଖେଳାଳିମାନେ ଏହି କାର୍ଯ୍ୟ କରନ୍ତି, ଅନ୍ୟ କେହି ସେମାନଙ୍କ ପଦକକୁ ପାଟିରେ ଛୁଇଁ ପାରିବେ ନାହିଁ। ଏଠାରେ ମେୟର କେବଳ ଦାନ୍ତରେ ପଦକ ଚୋବାଇ ନାହାଁନ୍ତି ବରଂ ଏହାକୁ ଭାଙ୍ଗି ଦେଇଛନ୍ତି।
ପଦକ ଭାଙ୍ଗିବା ପରେ ବିବାଦ ଜୋରଦାର ହୋଇଥିଲା। ତେବେ ମେୟର କ୍ଷମା ମାଗିଛନ୍ତି ଏବଂ କହିଛନ୍ତି ଯେ ନୂତନ ପଦକ ପ୍ରଦାନ କରିବାର ସମସ୍ତ ଔପଚାରିକତା ଉପରେ ସେ ନିଜେ ଖର୍ଚ୍ଚ ବହନ କରିବେ। ଅନ୍ୟପକ୍ଷରେ ଖେଳାଳିଙ୍କୁ ଆଉ ଏକ ପଦକ ଦେବାକୁ ପ୍ରସ୍ତୁତ ବୋଲି ଅଲିମ୍ପିକ୍ କମିଟି କହିଛି।
ସାମ୍ବାଦିକ ସମ୍ମିଳନୀରେ ମେୟର କହିଛନ୍ତି ଯେ ସେ ସ୍ୱର୍ଣ୍ଣ ପଦକ ବିଜେତାଙ୍କ ପଦକ ନଷ୍ଟ କରିଥିବାରୁ ପ୍ରକୃତରେ ଦୁଃଖିତ। ମେୟରଙ୍କ ଏହି କାର୍ଯ୍ୟକୁ ବିଭିନ୍ନ ମହଲରେ ଘୋର ସମାଲୋଚନା କରାଯାଉଛି। ଅନେକ ଖେଳାଳି ଏହାକୁ ଅପମାନଜନକ ବୋଲି କହିଥିବା ବେଳେ କେହି କେହି ଏହା ଖେଳର ଆତ୍ମା ପ୍ରତି ଅପମାନ ବୋଲି କହିଛନ୍ତି।
